وأنا بجمع تبرعات النهاردة لمدينة زويل للعلوم والتكنولوجيا حاولت اخد رأي أشخاص وهيا بتتبرع أو وهيا ممتنعة عن التبرع:
اللي اتبرعوا
*أنا كان نفسي من زمان في مشروع زي ده.
*المشروع ده لازم مش واحد بس اللي يجمع المفروض كل واحد مننا يجمع هوا انتا بتجمع لوحدك؟
اللي امتنعوا
*وهيا الحكومة فقيرة عشان نلم تبرعات؟ ما تدفع هيا؟
*لا أنا رحت البنك واتبرعت خلاص.
*أنا معملتش حسابي النهاردة،ممكن ألاقيك تاني فين.
*حرية شخصية.
الحكومة في أزمة تلوقتي بين ارتفاع الأسعار نقص السلع زيادة مرتبات زراعة صناعة بورصة محاكمات أما التمويل العلمي حاليا مش هينفع لإن البلد محتاجة مصدر سريع للدخل وإلا تبقى في أزمة مستفحلة ،وأرباح الأبحاث مش بتيجي في فترة بسيطة.
*طيب ما ياخدوا الفلوس دي من اللي سرقوا البلد ؟
الدولة فعلا بتحاول إنها ترجع أكبر كمية ممكنة من اللي اتسرق منهم، أدامك بقى إنك تستنى كام سنة تستنى وممكن في الاخر ماتخدش لا حق ولا باطل أو ملاليم بالنسبة لحجم المشروع، ويبقى رجعنا لنفس النقطة تاني.، مفيش داعي للتأخير أكتر من كده، عشرين سنة كفاية من الانتظار عشان مشروع مهم زي ده يتعمل.
*ده أنا لو اتبرعت للفقير هيكون أحسن ؟
مش كونك إنك اتبرعت يبقى خلاص تنسى الفقير السنادي، محدش قال كده ،فعلا المشروع ده مفيد ليك قبل ما يكون مفيد للفقير لكن في الاخر هتعود فوائد المشروع على الكل للفقير والغني ، لكل واحد على أرض مصر، وكمان ممكن ثوابه يكون أكبر لو حطيت في بالك وانت بتترع أكتر من نية
زي طلب العلم ، تنمية المجتمع وعمارة الأرض ، مساعدة طالب علم ، مساعدة الفقير، .......
*فين المستثمرين والشركات طيب راحت فين؟
وهوا إيه اللي يشجع شركة أو مستثمر إنه يدعم إنشاء المدينة وهوا مش واثق إنها هتجيبله بوادر أرباح سريعة أو بطيئة حتى ،في الغالب المستثمر بيدور على الربح.
*مش هديك عشان أحمد المسلماني امبارح قال ماتدوش تبرعات لحد ، كل واحد يروح البنك ويحط اللي هيتبرع بيه.
الفكرة في الأساس كانت للتسهيل على الناس مش معقولة إن لو هتبرع بجنيه هروح البنك وأقوله ضيفه في الحساب عندك أكيد فيه ناس هتكسل وناس هتقول يعني الجنيه بتاعي هوا اللي هيأثر.
*الحالة ضنك.
ربنا ييسرلك حالك.........................تاخد حبة تبرعات؟
ليست هناك تعليقات:
إرسال تعليق