تلاكيك...كلاكيت أول مرة

قد تطورت اللغة العربية وأصبحت لغة flexible الان بإمكانك عدم الالتزام بقواعد اللغة العربية . اعلان يأتي كثيرا بطريقة غير مباشرة ؟ يعني الأخطاء في الكتابة بقت حاجة شائعة والواحد بيشوفها سواء في المنتديات أو التلفزيون أو...... ودي حاجة بقت عادية بس حبيت أقولها كنوع من محاولة إيضاح بعضها........... أو كنوع من التلاكيك ؟! شعار النهاردة بقى اكتب وخلي اللي يقرأ يفكر شوية ؟! بإنه يجرب احتمالات الكلمات المكتوبة بشكل جديد ؟؟! دي مشكلة ودا بيبان لما تحب تبحث عن حاجة بالعربي هتتعب لإن اعتقد إن احتمال إنه يظهرلك حاجة إنت مش عاوزها هتزيد واحد هيقولي إزاي يعني ما نتائج البحث في جوجل بتطلع عادي اه معاك حق ؟! طب اكتب مثلا تبرءة بدل تبرئة وشوف هيطلعلك ايه ؟ هتتطلعلك النتائج صح اللي انت عاوزها ؟ اه بس ده لإن في ناس بتكتبها كده وكمان جوجل بيجيب أقرب حاجة للكلمة اللي انت كاتبها وماشي على الجوريثمات معينة ، طيب خلاص مش مشكلة . هوا الأهلي امبارح غلب أسمنت اسيوط بكام؟ ما علينا تلوقتي هوا انا لو كتبت عنوان اسمه" يوم الاثنين غدا" تفهم إيه منه؟ افهم إن يوم الإثنين بكرة عادي وبعدين بكرة مش الإثنين وإيه العنوان الغريب ده؟ بس دي معناها إن في اتنين بكرة هيتجوزوا وهيكتبوا اساميهم وصورهم وكده يعني واحد يقولي لا معتقدش وانت عرفت ازاي؟ اقوله منت لو عارف إن يوم الإثنين اللي هوا يوم من أيام الاسبوع لازم يكون فيه همزة أما الاثنين فده مثنى كنت فهمت من الأول. شفت ازاااي ؟!! برضه دي حاجة بسيطة في الاخر،واحد يقولي على فكرة زمان مكانوش بيكتبوا التشكيل ده خالص وكانوا بيعرفوا بالفهلوة أنا مكنتش عاوز أقولك الكلام ده بس هوا ده الأصل في الاخر،مضبوط لكنهم كانوا بيتميزوا بالفصاحة في اللغة العربية والتشكيل مكنش ليه تأثير لكن دخول الأعاجم في الإسلام زود الحاجة لاستخدام التشكيل في اللغة العربية لللنطق الصح ليها لإن لو النطق بقى غلط بالتالي الكتابة هتكون غلط وبكده كل هيكتب على حسب نطقه وتضيع أصول اللغة العربية سواء تشكيل أو اعراب ، و القران الكريم مكنش مكتوب بالتشكيل فعلا بس لما حسوا إن التشكيل مهم استخدموه لإن النطق الغلط أو الكتابة الخطأ في أبسط الحاجات ممكن تنتج معنى تاني غير المقصود وفي بعض الحلات ممكن ينتج عكسه كمان. واحد يقولي بس إحنا في عصر السرعة ومش معقولة هدوس SHIFT كل شوية عشان أجيب تشكيلة أو همزة معينة إيه وجع الدماغ ده. اقوله اه عندك حق هيا محتاجة تعود ومتعبة شوية بس انت في كتابتك اصلا بتستخدم حروف في مكان المفروض ميتحطش فيها يعني مثلا امتحان ممكن تكون كاتبها كده إمتحان وفي مكان تاني عاملها كده أمتحان فده معناه ايه؟المفروض انها امتحان من غير همزة. لا والجديد ان في ناس بتبدل بين ال "ز" و "ذ" عادي كإن مفيش فرق خالص ولو قلنا يمكن عشان بيكتبوا بسرعة فده مستحيل لإن المسافة بين الحرفين كبيرة . أنا شايف إن نتائج الاخطاء دي وعدم الاهتمام بيها أو الإشارة ليها حتى بيخلي اللغة تضعف بطريقة بتزيد كل يوم عن التاني . هوا ممكن في جوجل اعمل بحث بحرف واحد حاجة غريبة ؟ ياترى في حد بيعمل بحث بحرف واحد وهيستفيد ايه؟؟؟؟؟؟! و لو جيت عشان اكتب تهيأة مثلا وبدأت تكتبها "تهي.." هتلاقي طلعلك تهييس أقرب كلمة من الكلمات اللي بتظهر وانت بتكتبها ؟؟على أساس ايه؟مش عارف المهم أنا بفكر بس في المستقبل إن بالطريقة دي لو زادت نسبة الكلمات المستخدمة أو اللي بتظهر بالشكل ده عن الكلمات اللي المفروض نزودها أصلا التعليم ممكن يتقلب كله باللغة النجليزية زي بعض الكليات في الجامعات إزاي؟ أقولك يا بشمهندس لما كل يوم الناس بتظهر حاجة جديدة في العلم وأي معلومة عنها أكيد هتتكتب بالإنجليزي، طيب عادي ماحنا ممكن نترجمها وهتوصل بالضبط زي ماهيا من غير ما اغير في المعنى أيوه لكن انت عمرك قرأت كتاب مترجم ؟ دي الترجمة دايما بتكون عجيبة ومش بيتفهم جمل كتير منها. المشكلة دي ممكن تأثر على مستوى العلم عندنا أو أثرت خلاص لإن المعلومة لو وصلت عندنا مترجمة ممكن تكون غلط أو مش مفهومة ولو موصلتش فناس قليلة بالنسبة لعدد الناس اللي بتتكلم عربي هيا اللي هتقدر توصل للمعلومة وتفهمها صح وبالتالي ممكن يستخدموها و يطوروا عليها وممكن منها يجيبوا معلومات جديدة. إحنا كده مستوى التطوير عندنا ماشي بمعدل أقل من الدول الأجنبية. طيب الحل إيه ؟إن احنا نجيب مترجمين على كفاءة عالية هدفهم إيصال المعلومة للناس بكلام مبسط ومفاهيم واضحة ونعممها ممكن تكون خطوة بس مش كفاية ؟ ياترى ايه الحلول؟وهل فيه مشكلة أصلا ولا دي تلاكيك؟ ولو هيا مش مشكلة اقولك ايه رأيك في تقليل حجم الكيبورد ؟ يعني ممكن الحاجات اللي ملهاش لازمة نشيلها يعني أي حرفين شبه بعض نشيلهم ونخليه حرف طالما الناس بتشتغل على حرف يعني حرف ال"هـ" بلاه ، خليه "ة" بس كفاية وحرف ال"ى" شيله وسيب حرف "ي" بس فكرة برضه مش بقولك طب بص انت ممكن تقللها أكتر من كده كمان ازاي؟ نشيل ال"ب"و"ت"و"ث" و"ن" وتخليه حرف ممكن تحط بدالهم حاجة Generic زي زمان اللي هيا من غير نقط خالص وبلا وجع دماغ. بس لو كده اتوقع ان المواضيع اللي هتتكتب بعد عشرين سنة هيكون منظرها كده ان استلقت مين الص3يقة مين فاتره ياة 1ذاى القلام دة 3صال؟ اصل المرااجع مبلفوس لذمه ياترى حد فاهم حاجة شوية فرانكوا على شوية حول في كتابة الحروف هيديك الكلام اللي فوق ده فمن هنا أنادي أي شخص يكتب موضوع أو مشاركة في أي منتدى أو موضوع أن يحاول على قدر المستطاع أن تكون كتابته قريبة من اللغة العربية حتى يستفيد منه عدد أكبر وخصوصا في المواضيع التقنية ،هذه كبداية لكن الأهم حاليا هوا مرحلة الترجمة المبسطة للمواضيع والكتب من اللغات الأخرى إلى اللغة العربية فهل من مجيب لهذه الدعوة؟؟ّ! أي أفكار لتطبيق هذه الفكرة مرحب بها